ജാലിയൻവാലാബാഗ്

നിങ്ങൾക്കു പറയാം, 

ജാലിയൻ വാലാബാഗിൽ 

കൂട്ടക്കുരുതിയിൽ 

മരിച്ചവനാണെന്ന്...

സ്വാതന്ത്ര്യം വേണമെന്ന് 

ഉദ്‌ഘോഷിച്ച നാളുകളിലൊന്നിൽ 

ചവിട്ടിയരക്കപ്പെട്ട 

പേക്കോലങ്ങൾക്കൊപ്പം 

നിങ്ങളും... 

*ഡയർ, 

ഇടുങ്ങിയ 

വഴിയിലൂടെ ആക്രമിക്കാൻ 

വരുന്നെന്നുപറഞ്ഞവന്റെ 

വായ്ത്താരികൾ 

അമർത്തപ്പെട്ടപ്പോൾ, 

വാക്കുകളിൽ തേനിറ്റിച്ച 

നേതാക്കൾ നോക്കിനിന്നപ്പോൾ 

ചീറിവന്ന മുന്നൂറ്റിമൂന്നിൻ 

ചിലമ്പുകളേറ്റുപിടഞ്ഞുവീണപ്പോൾ, 

നിങ്ങൾക്കുപറയാം, 

ജാലിയൻ വാലാബാഗിൽ 

കൂട്ടക്കുരുതിയിൽ 

മരിച്ചവനാണെന്ന്... 

ആർത്തട്ടഹസിച്ച വെള്ളക്കാർ 

കൊള്ളയടിച്ച ഭാരതത്തിൻ 

സ്വത്തും സ്വർണവും 

രക്തവും മാംസവും 

ഊറ്റികുടിച്ച് 

ഭാരതമണ്ണിൻമക്കളുടെ 

ചിന്തുകളും സന്തോഷ -

തിമിർപ്പുകളും 

പെണ്ണിൻകൊതിയൂറും 

മൊഞ്ചുകളും ചവിട്ടിയരച്ചതു -

കണ്ടപ്പോൾ, 

കണ്ടുകൺനിറഞ്ഞപ്പോൾ 

നിങ്ങൾക്കും പറയാം 

ജാലിയൻ വാലാബാഗിൽ 

കൂട്ടക്കുരുതിയിൽ 

മരിച്ചവനാണെന്ന്...

സ്വാതന്ത്ര്യം...

അരവയർ നിറയാക്കാലത്തിൽ 

തേൻ ഇറ്റും വാക്കാകും 

മുല്ലപ്പൂവിൽ കോർത്തൊരു 

പല്ലവിയിൽ സ്വാതന്ത്ര്യം 

വേണമെന്നുറക്കെ പറയിച്ചവരിൽ 

ആരുമേതുമറിയാതെ സർവ്വരും 

വീണുമരിച്ചവരിൽ

നിങ്ങളും, ജാലിയൻ വാലാബാഗിൽ 

കൂട്ടക്കുരുതിയിൽ 

മരിച്ചവനാണെന്നു പറയാം.