ಸಂತೆ

ನಮ್ಮೂರ ಸಂತೆಯಲಿ

ನಾನೊಬ್ಬ ಗ್ರಾಹಕ

ವ್ಯಾಪಾರ ಭರದಲ್ಲಿ

ಮರೆತು ನಿಂತೆ ಅಲ್ಲೇ

ಮನೆಗೆ ಹಿಂದಿರುಗದೇ

ಸಾಲು ಸಾಲು ಅಂಗಡಿಗಳು

ಬಣ್ಣ ಬಣ್ಣದ ಬತ್ತಾಸು ಗಳು

ತೂಗಾಡುತಿಹ ಬಲೂನುಗಳು

ಚಾಕಲೇಟ್ ಬಿಸ್ಕೆಟ್ ಗಳು

ಆಸೆಗಣ್ಣಿಂದ ನೋಡುತ್ತಾ ನಿಂತೆ

ತೆಂಗಿನ ಕಾಯಿ ಬಾಳೆಹಣ್ಣು

ಮೆಣಸಿನಕಾಯಿ ಹುಣಸೇಹಣ್ಣು

ಕಾಯಿಪಲ್ಲೆ ಹಣ್ಣುಗಳು

ಕೈ ಬೀಸಿ ಕರೆದವೆನ್ನನು

ನೋಡುತ್ತಾ ನಿಂತು ಬಿಟ್ಟೆ

ಸಂತೆ ವ್ಯಾಪಾರದೊಳು

ಕಾಸುಗಳ ಎಣಿಸುತ

ಚೀಲಗಳ ತುಂಬಿಸುತ

ನಿಂತೆನಲ್ಲಿಯೆ ನಾನು

ಮನೆಯ ಮರೆತು

ಸಂಸಾರ ಸಂತೆಯಲಿ

ಬಾಲ್ಯ ಯೌವನ ವ್ಯಾಪಾರ

ಮುಗಿದೇ ಹೋಯಿತು

ಮತ್ತೆ ಇಣುಕಿತು ವೃದ್ಧಾಪ್ಯ

ಸಂತೆಯ ಕೊನೆಯ ವ್ಯಾಪಾರ

ಈಗ ಭಯವಾಗಿದೆ ಎನಗೆ

ಸಂಸಾರ ಸಂತೆ ಮುಗಿಸಲು

ಆದರೂ ಮುಗಿಸಲೇ ಬೇಕು

ಮನೆಗೆ ಹೋಗಲೇ ಬೇಕು