ನಿನಗೆ ನಾನು ನನಗೆ ನೀನು

 

ಬಡವನ ಗುಡಿಸಲು ಮೆಚ್ಚಿ ಬಂದೆ 

ಒಡಹುಟ್ಟಿದವರ ತೊರೆದು ನಿಂದೆ

ಏಳು ಹೆಜ್ಜೆ ಇಟ್ಟು ಮನವ ತುಂಬಿದೆ

ಏಳೇಳು ಜನ್ಮಕೂ ಸಂಗಾತಿ ನೀನೆಂದೆ

ಬಯಸಿ ಬಯಸಿ ಹರಕೆಯನು ಹೊತ್ತೆ

ಬಂಗಾರದಂಥ ಮುದ್ದು ಮಕ್ಕಳನ್ನು ಹೆತ್ತೆ

ಸಾಕಿ ಸಲಹುತ ಪ್ರೀತಿ ವಾತ್ಸಲ್ಯವ ಕೊಟ್ಟೆ

ಮಾತೃ ಹೃದಯದಿಂದ ಕೈತುತ್ತನ್ನು ಇಟ್ಟೆ

ತಾಯಿ ಹಾಲು ವಿಷವಾಗಿ ಹೋಯಿತಿಂದು

ತಂದೆ ಸಂಸ್ಕಾರ ನಾಶವಾಯಿತು ಯಾಕಿಂದು

ನಾವು ಹೆತ್ತ ಮಕ್ಕಳು ನಮಗಾಗಲಿಲ್ಲವಿಂದು

ನಾವಿಟ್ಟ ಕನಸುಗಳು ಹೊಸಕಿ ಹಾಕಿದರಿಂದು

ಹಗುರಾದ ಮನಸಿನಲ್ಲಿ ಭಾರವಾದ ನೋವಿಟ್ಟು

ಬಿಟ್ಟೋದ ಮಕ್ಕಳವರು ಅಕ್ಕರೆಗೆ ಕೊಳ್ಳಿ ಇಟ್ಟು

ಬೇರೆ ಯಾರೂ ಬರರು ನಮ್ಮಯ ಬದುಕಿಗಿನ್ನು 

ನಿನಗೆ ನಾನು ನನಗೆ ನೀನು ಇಷ್ಟೇ ಜೀವನವಿನ್ನು