ಹೆಣ್ಣು

ಮನದಲ್ಲಿ ನೋವುಂಡು ಜನರ ಎದುರಲ್ಲಿ

ಮಂದಹಾಸ ತೋರುವಳು ಯುಗದಿ ಹೆಣ್ಣು

ನೂರಾರು ಕನಸುಗಳ ಎದೆಯಲ್ಲಿ ಬಚ್ಚಿಟ್ಟು

ತನ್ನವರಿಗಾಗಿ ನಿತ್ಯ ಶ್ರಮಿಸುವಳು ಹೆಣ್ಣು

ಜರಿಯುವರ ನಡುವೆ ಜಾಣತನದಿ ಇರುವಳು

ಜೊತೆಗಿರುವರ ನೆರಳಂತೆ ದಿನ ಕಾಯುವಳು

ಬವಣೆಯ ಬದುಕಲಿ ಹೊತ್ತಿ ಉರಿಯುವಳು

ದೀಪದಂತೆ ಸದಾ ಬೆಳಗುವ ಜ್ಯೋತಿಯಿವಳು

ಅವಮಾನ ಅನುಭವಿಸಿ ನಿಂದನೆಯ ಸಹಿಸಿ

ಅನುಮಾನ ಅಹಂಕಾರ ಎಲ್ಲಾ ದೂರವಿರಿಸಿ

ಅನುಗಾಲ ಬೇಡುವಳು ಕುಟುಂಬದ ಸುಖವ

ತನಗಾಗಿ ಕೇಳದವಳೆಂದು ಯಾವುದೇ ವರವ

ಸಮಯ ಕೊಟ್ಟಿಲ್ಲ ಅವಳೆಂದು ತನ್ನತನಕಾಗಿ

ಗೌರವ ದೊರೆತಿಲ್ಲ ಇನ್ನೂ ಅವಳ ತ್ಯಾಗಕಾಗಿ

ಆದರೂ ಕಿಂಚಿತ್ತೂ ಬೇಸರವಿಲ್ಲ ಅವಳಲ್ಲಿ 

ಯಾಕೆಂದರೆ ಸ್ತ್ರೀ ಎಂದಿಗೂ ಪರೋಪಕಾರಿ