ಮಲ್ಲಿಗೆ ಮಾಲೆ

ಮಲ್ಲಿಗೆ ಬುಟ್ಟಿ ತಲೆಯಲಿ ಇಟ್ಟು 
ಮಾರುತ ಬರುತಿಹಳು 
ಮಲ್ಲಿಗೆ ಮಾಲೆ ಪರಿಮಳ ಬೀರಲು
ಮುಗಿ ಬೀಳುವ ನಾರಿಯರು 

ಘಮ ಘಮಿಸುವ ಮಲ್ಲಿಗೆ ಮಾಲೆ
ಬಾಲೆಯರ ಸೆಳೆಯುವುದು 
ದೇವರ ಪಾದವನ್ನು ಸೇರುವ ತವಕದಿ 
ಮಾಲೆಯೂ ಬಯಸುವುದು 

ಮುತ್ತೈದೆಯರ ಸೌಭಾಗ್ಯದ ಸಿರಿಯನು 
ಕೊಳ್ಳಲು ಬರುತಿಹರು 
ಸತಿಗೆ ಪತಿಯ ಒಲುಮೆಯ ಸುಮವು 
ಮುಡಿಯನೇರಿ ನಲಿಯುವುದು.

ಮಾಲೆಯ ಬುಟ್ಟಿ ಖಾಲಿ ಆಗುತಲಿ 
ಮನೆಗೆ ಮರಳುವಳು 
ದುಡಿದ ದುಡ್ಡನು ಎಣಿಸಿ ನೋಡುತ 
ಸಂತಸದ ನಗೆ ಬೀರುವಳು 

✍️ ಸೂಗಮ್ಮ ಡಿ ಪಾಟೀಲ್ 
      ಉತ್ನಾಳ್