ದಾರಿಹೋಕನ ಪದಗಳು

ಬೆಲ್ಲದಂಥ ನುಡಿಗಳು ಮರುಳನ್ನು ಮಾಡುವುದು

ಮರುಳಾದ ಜನಗಳು ಬೀಳುವರು ಬದುಕಲ್ಲಿ

ನಿಜವನ್ನು ಹೇಳಿದರೆ ತಳ್ಳುವರು ಹಿಂದಕ್ಕೆ ಲೋಕದ

ಜನರ ತಿಳಿವುದು ಸುಲಭವೇ ? - ದಾರಿಹೋಕ

ಎಲ್ಲವನು ಬಲ್ಲವನು ಜಗದಲ್ಲಿ ಸಿಗುವನೆ

ಬಲ್ಲೆನೆಂದು ನಡೆದವ ಎಲ್ಲವನು ಗೆಲ್ಲುವನೆ

ಕೊನೆಯಿಲ್ಲ ಕಲಿಕೆಗೆ ಕೊನೆಯುಂಟು ಬದುಕಿಗೆ ಜಗದಿ

ಕಾಣದಾತನ ಕೈಚಳಕ ವಿಚಿತ್ರವೋ – ದಾರಿಹೋಕ

 

ತಿರುಗುವ ಭೂಮಿಯನು ನಿಲ್ಲಿಸಲು ಆಗುವುದೇ ?

ತಿರುಗದೆ ಇದ್ದರದು ಜೀವಿತವು ಸಾಗುವುದೆ ?

ಅಲೆದಾಟ ತಿರುಗಾಟ ಬದುಕಲ್ಲಿ ನಿಲ್ಲುವುದೆ? ಬಾಳೊಂದು

ರಂಗುಲ ರಾಟ ತಿಳಿಯೋ - ದಾರಿಹೋಕ

 

ಇರುವಾತ ಕೊಡಲಾರ ಕೊಡುವಾತ ಇರಲಾರ

ಕೊಟ್ಟವನು ಕೆಡನಯ್ಯ ಎನ್ನುವನು ಮತಿವಂತ

ಕೊಡುವ೦ಥ ಗುಣವಿರುವ ನೀಡುವ ಕೈಗಳೆದುರು

ನಿಲುವ ದೈವವು ಕಿರಿದೋ - ದಾರಿಹೋಕ

 

ಬದುಕೊಂದು ಗಣಿತವೋ ಸುಖವನ್ನು ಕೂಡಿಕಳೆ

ದುಃಖವನು ಜೀವನದಿ ಹಿತವನ್ನು ಗುಣಿಸುತ್ತಾ

ಒಳಿತನ್ನು ಭಾಗಿಸುತಾ ಕರ್ಮದಲಿ ಅಗಣಿತಕೆ ಸಾಗಿ

ಮಿನುಗುತಾರೆ ಆಗೆಲೋ - ದಾರಿಹೋಕ