ಅಜ್ಞಾತ

ಹೂತು ಹೋದವು ಹಲವು ಭಾವಗಳು

ಹೇಳಿಕೊಳ್ಳಲಾಗದ ನೂರು ನೋವುಗಳು 

ಹೃದಯ ಗರ್ಭದೊಳಗೆ ಹುದುಗಿ ಕುಳಿತು

ಹೊರಗೆ ಬರಲಾರದೆ ಭಯದಿಂದ ಬಳಲಿ

ದಾಂಪತ್ಯ ಗೀತೆಯ ನೂರು ಅಪಸ್ವರಗಳು

ಕೋಪ ತಾಪಗಳ ಹಸಿ ಬಿಸಿಯುಸಿರುಗಳು

ಪಾಪ ಪ್ರಜ್ಞೆಯ ಪಶ್ಚಾತ್ತಾಪದ ಭಾವಗಳು

ಕೂಪದೊಳಡಗಿ ಹೋದವು ಅಜ್ಞಾತವಾಗಿ

ಸಂಸಾರದ ಸಾವಿರ ಸಾವಿರ ನೋವುಗಳು

ಬಿಸಿ ತುಪ್ಪವಾಗಿ ಕಾಡಿ ನಾಲಿಗೆಯ ಸುಟ್ಟು

ಕಸಿವಿಸಿಗೊಳಿಸಿದ ಬದುಕಿನ ಭಾವಗಳು

ಮಿಸುಕಾಡುತ ಮನದೊಳಗೆ ಅಡಗಿದವು

ಬೆಲೆ ಸಿಗದ ಹಲವು ನವಿರಾದ ಭಾವಗಳು

ಅಲೆದಲೆದಾಡುತ್ತಾ ಮನದ ಒಳಗೊಳಗೇ 

ಸುಳಿಸುಳಿದು ಸುತ್ತಾಡಿ ಹೊರ ಬರಲಾಗದೇ

ಬಳಲಿ ಬೆಂಡಾಗಿ ಹೂತು ಹೋದವು ಒಳಗೇ