भोजपुरी चुनावी गीत

आई गईले देशवा चुनाव के त्योहार ये बलम जी

जाइब हमहु देवे भोटवा हमार ये बलम जी।

सरोहों सिंगार करी संगवा सखिया सहेलियाँ

गाई -गाई गीतिया देईब भोटवा हमार ये बलम जी।

धोतिया कुरुतवा पहिन बांधी मथवा पगरिया

हाली चला खातिर देवे भोटवा तोहार ये बलम जी।

सास ससुर अउरी देवर ननदो ले जाइब

दिहल जाई भोटवा आई देशवा बहार ये बलम जी।

देई ना जे भोटवा देशवा कहाई दगाबाजी

सुना लोगवा जितावा देशवा ललकार ये बलम जी।  

  

हिन्दू मुस्लिम सीख ईसाई सबके हउवे त्योहार हो

देके भोटवा ले ला आपन अधिकार ये बलम जी।