ઓલ્ડ ઈઝ ગોલ્ડ

પુરાતત્વ વિભાગમાં માસ્ટર્સ થઇને આવેલી પૌરવી એવી કેટલીક ગુફાઓની મુલાકાત બાદ એની જર્જરિત હાલત જોઇને બહાર આવીને મીડિયા સમક્ષ બળાપો ઠાલવી રહી હતી.

" વી શુડ પ્રોટેક્ટ અવર આર્કિયોલોજીકલ પ્રોપર્ટી. ઓલ્ડ ઇઝ ગોલ્ડ. આ વર્ષો જુની પૂરાણી ગુફાઓમાં કુદરતનાં કંઇ કેટલાંય રહસ્યો છુપાયેલાં છે. સરકારની જવાબદારી છે છતાં ન સમજે તો આપણા જેવા આવી અસ્ક્યામતોની કિંમત સમજનારા લોકોએ એક થઈને કોઈ મજબૂત પગલાં લેવાં જોઈએ.”

પૌરવીના આ વેધક સ્ટેટમેન્ટને કેટલીય ચેનલોએ પ્રકાશિત કરીને એને પ્રસિધ્ધ બનાવી દીધી. 

રિસર્ચ પ્રોજેક્ટ પતાવીને પંદર દિવસે ઘેર આવતાં જ સમજણા થઇ રહેલા દિકરાએ કહ્યું,

" મમ્મા, યૂ ડીડ એક્સલન્ટ જોબ. તેં તો સરકારની આંખ ઉઘાડી નાખી. "

પૌરવી ગર્વ અનુભવી રહી. 

પણ તરત જ દિકરાનું બીજું વાક્ય આવ્યું, 

" તો મમ્મા, દાદા દાદી પણ આપણી પુરાણી પ્રોપર્ટી જ થઇને? 

આપણે એમની બહુ જ કાળજીપૂર્વક જાળવણી કરવી જોઈએને!”

સાસુ સસરાની સાથે હંમેશાં અનુચિત વ્યવહાર કરતી પૌરવી દિકરા સાથે નજર ન મેળવી શકી.

દિકરો હજી મમ્મીના વાક્યને પુનરાવર્તિત કરી રહ્યો હતો,

“ઓલ્ડ ઈઝ ગોલ્ડ.”