અલગારી

અલગારી

પાલો અલ્ટોની ગલીઓમાં લિન્ડોનું સંગીત ધુમાડાની જેમ રોજ સાંજે તરતું હતું, નાજુક, હૃદયસ્પર્શી, અવિસ્મરણીય.

તેની જર્મન મેક હોફમેનની ગિટાર માત્ર એક વાજીંત્ર  નહોતું ; તે સ્મૃતિઓનું વહાણ હતું .

વર્ષો પહેલાં, ટેક્સાસના રમખાણો દરમિયાન, તેની નાની બહેન યામા અફરાતફરીમાં ખોવાઈ ગઈ હતી.

પરિવાર તેને, પછી ક્યારેય શોધી શક્યો નહીં. એ રાત લિન્ડોની આત્મામાં એક નિઃશબ્દ ગિટારનો સાતમો તાર બની રહી ગઈ. તેની દરેક ધૂન નીચે ધબકતું દુઃખ જોડાયેલું હતું .

હવે, જ્યારે લિન્ડો ગિટાર વગાડતો, અજાણ્યા લોકો આનંદિત થઇ તેનો તાલ સાંભળતા, અને પાચ-દસ ડોલરની ટીપ પણ આપતાં.

પરંતુ દરેક લિન્ડોનાં વગડેલા દરેક સ્વરમાં  એક ગુપ્ત આહ્વાન છુપાયેલું હતું.એક એવી આશા  કે ક્યાંક, ક્યારેક, તેની નાની બહેન યામા એ ધૂન સાંભળે અને પ્રતિસાદ આપે.

એક શુક્રવારની સાંજે , જ્યારે યુનિવર્સિટી એવન્યુ પર દીવડાં ઝબૂકતા હતા, એક સ્ત્રી તેની પાસે અટકી. તેણે કંઈ કહ્યું નહીં. માત્ર ધીમેથી, સ્થિર સ્વરે, એ જ ધૂન ગુંજાવી — જે લિન્ડોએ ક્યારેક ટેક્સાસના આકાશ નીચે તેની બહેનનાં જન્મ દીવાસે  વગાડેલી.

ગાનાર આગંતુક મહિલાનો ખુલ્લો સ્વર લિન્ડોની ગિટાર સાથે પ્લેરિઓનેટ જેમ બુલંદ પ્રતિધ્વનિ બની એક થઇ ગયો. કોઈ જૂની સ્મૃતિ જેટલો નાજુક,અને અવિનાશી.

લિન્ડોની આંગળીઓ તાર પર અટકી ગઈ. યુનિવર્સીટીની ગલીઓ શાંત થઈ  ગઈ.

પ્રથમ વખત, એ અલગારી ગિટારવાદકે અનુભવ્યુ કે સંગીત માત્ર આજકાલ નાં કોલેજ પ્રેમીઓને નહીં, વર્ષોની વિયોગથી તડપતા દિલને પણ જોડે શકે છે.

વર્ષો પછી આજે  તેની ધૂન ખરેખર એટલી દૂર પહોંચી ગઈ હતી કે તેને તેની બહેન યામા સાથે  મેળાપ કરાવી શકે.


અલગારી રહેવું એ લોકોથી ગેરહાજર રહેવું એ નથી, પરંતું મેળાપની ગેરહાજરી છે. વર્ષો સુધી લિન્ડોનું સંગીત, એક ખાલીપામાં  પોકાર હતું.

એની આત્મા સુધી પહોંચવાની તરસ કયારેય ઓસરી નહતી . પરંતુ જ્યારે તેની બહેનનો સ્વર પ્રતિસાદ આપ્યો, ખાલીપો વિલીન થઈ ગયો. લિન્ડોએ સમજ્યું કે  અલગારીપણું રૂપાંતરિત થઈ શકે છે. ભીડથી નહીં, તાળીઓથી નહીં, પરંતુ એક પ્રતિધ્વનિથી જે સાબિત કરે છે કે આપણો સ્વર કોઈના હૃદય સુધી પહોંચ્યો છે.

બીજા શુક્રવારની સાંજે, હવે લિન્ડો એકલો નહતો , કારણ કે તેની ધૂનને શ્રોતા નો સાથ મળી ગયો છે. અને હવે દરેક ક્ષણે, તેની ગિટાર અને યામા નાં સ્વરથી ગલીઓ ફૂસફૂસાવતી થઇ.

જ્યારે પ્રેમ સંગીત બનીને શાંતિને પાર કરે છે, ત્યારે કોઈ અલગારી કેવી રીતે હોઈ શકે.

શીર્ષક પરિચય ~

અલગારી~(સંજ્ઞા / ભાવવાચક શબ્દ)

એક એવી આંતરિક એકલતા,
જે ભીડ વચ્ચે પણ સતત અનુભવાય;
જ્યાં માણસ લોકો વચ્ચે હોવા છતાં
મેળાપ, પ્રતિસાદ અને આત્મીય સ્પર્શ માટે તરસતો રહે.

અલગારી માત્ર મૂંગું એકાંત નથી —
તે કોઈ પોતાના સ્વરની પ્રતિધ્વનિ શોધવાની અધૂરી ઝંખના છે.

© 2026 Kalpesh Patel. 
All rights reserved.