Library
Profile
ઠંડાઈ
ઠંડાઈ
ઠંડાઈ
એક હાસ્ય-બોધ કથા
અમદાવાદના જમાલપુર વિસ્તારમાં કાસમ મિયાંની નાની ફાલુદાની દુકાન હતી.
“કાસમ ફાલુદા ઠંડાઈ સેન્ટર”.
દુકાન નાની,
પણ કાસમ મિયાંના ડાયલોગ મોટા… અને મિજાજ હોટ! 🔥
દરેક ગ્રાહક આવે એટલે કાસમ મિયાં ગર્વથી કહે:
“મિયાં, આ ફાલુદો નહીં… દિલને ઠંડક આપતો ઈલાજ છે!”
પણ સાચી વાત એ હતી કે ઠંડા ફાલુદા અને ઠંડાઈ વેચતા કાસમ મિયાં પોતે જ સૌથી ગરમ મિજાજના માણસ હતા.
જો કોઈ ગ્રાહક કહે:
“બરફ થોડો વધારે નાખજો…”
તો તરત ગુસ્સે થઈ જાય:
“હું પંદર વરસથી ફાલુદો બનાવું છું! હવે મને શીખવાડશો?!”
---
એક સાંજે રમઝાનનો માહોલ હતો.
બજારમાં ભીડ…
લાઈટોની ચમક…
અત્તરની ખુશ્બૂ…
અને ગરમ સમોસાની સુગંધ!
કાસમ મિયાં દુકાન પર ઉભા-ઉભા પરસેવો લૂછતા ગ્રાહકોની રાહ જોઈ રહ્યા હતા.
એટલામાં એમની બેગમ ફાતિમા બેન આવી.
ફાતિમા બેન બહુ શાંત સ્વભાવની.
તાડની શેરીમાં બધા એમને
“ચાલતી-ફરતી સબર” કહેતા.
એમણે ધીમેથી કહ્યું:
“મિયાં, આજે ઈફ્તાર પછી થોડો આરામ કરી લેજો.”
કાસમ મિયાં તરત તાડૂક્યા:
“આરામ?!
પુરા પચાસ લિટર ઠંડાઈ બનાવી છે!
હું ગ્રાહકોનો દરિયો જોવા માંગુ છું…
અને તમે આરામની વાત કરો છો?!”
---
એટલામાં એક નાનો છોકરો, ઇશાક આવ્યો.
“કાસમ ચાચા, એક કટિંગ ફાલુદો આપજો… પણ સેવ ઓછી દૂધ વધારે .”
કાસમ મિયાંના મગજની સેવ તૂટી ગઈ!
“અરે ભાઈ!
તું તો ભારે અમદાવાદી નીકળ્યો!
આ કટિંગ ચા હોય, ફાલુદો થોડી હોય?!
અને ફાલુદામાં સેવ ઓછી એટલે શું?!
પછી કહેશ...
ચાચા ‘ગુલાબ સિરપ વધારે નાખો!’”
છોકરો ગભરાઈ ગયો.
ફાતિમા બેગમ હળવેથી બોલ્યાં:
“મિયાં… બાળક છે. અલ્લાહનો દૂત. પ્રેમથી બોલો.”
પણ સામે સમોસાવાળાને ત્યાં લાંબી લાઈન જોઈ કાસમ મિયાંનો ગુસ્સો હવે ઉકળતા દૂધ જેવો થઈ ગયો.
---
એટલામાં બાજુની મસ્જિદમાંથી આઝાન પછી અવાજ આવ્યો:
“સબર કરનારાઓ સાથે અલ્લાહ છે.”
ફાતિમા બેન સ્મિત કરીને બોલ્યાં:
“સાંભળ્યું, મિયાં?”
કાસમ મિયાં બોલ્યા:
“હું પણ સાંભળું છું…
પણ મારા ગ્રાહકો ક્યાં સાંભળે છે?” 😄
ફાતિમા બેગમ હસી પડ્યાં.
---
થોડીવાર પછી એક વૃદ્ધ હકીમસાહેબ આવ્યા.
એમણે ફાલુદો પીધો અને આંખો બંધ કરી બોલ્યા:
“વાહ મિયાં… શું ફાલુદો છે! મઝા આ ગયા......
મિયાં, આય સૂરજ પણ ઢળી ગયો…
પણ તમારું મગજ હજુ ગરમ છે!”
દુકાનમાં હાસ્ય ફાટી નીકળ્યું.
કાસમ મિયાં, હકીમસાહેબની ઉંમર જોઈ થોડા શાંત થયા.
હકીમસાહેબ ધીમેથી બોલ્યા:
“મિયાં, લખી રાખજો.
મીઠાઈ અને શાંતિ…
બન્ને ધીમે-ધીમે માણવી પડે.
ઉતાવળમાં ખાશો તો સ્વાદ બગડે…
અને ગુસ્સામાં જીવશો તો સંબંધ.”
આ વાત સીધી કાસમ મિયાંના દિલમાં ઉતરી ગઈ.
---
બીજા દિવસથી દુકાનનો માહોલ બદલાઈ ગયો.
હવે કોઈ કહે:
“બરફ વધારે નાખજો…”
તો કાસમ મિયાં હસીને કહે:
“મિયાં, ફાલુદો મારો ઠંડો છે …
અને દિલ એથી પણ ઠંડું!” 🍨😄
અને દુકાન પર નવું બોર્ડ લગાવાયું:
“અહીં ફાલુદા સાથે "સબર" પણ ફ્રી માં પીરસાય છે.”

~~~
સબરની ઠંડાઈ
જમાલપુર માં ગીત ગુંજે...
ફાલુદાની દુકાન નાની,
ડાયલોગ મોટા, મિજાજ હોટ! 🔥
ગ્રાહક કહે — “બરફ વધારે”,
કાસમ મિયાં બોલે — “હું જ જાણું!”
પણ ફાતિમા બેન હળવેથી કહે,
“પ્રેમથી બોલો, એ જ સબર.” 🌸
હકીમસાહેબ પીધો ફાલુદો,
બોલ્યા — “મીઠાઈ ધીમે માણો,
ગુસ્સો ધીમે ઓગાળો.”
અને એ દિવસથી કાસમ મિયાં,
હસીને કહે...
“ફાલુદો ઠંડો… દિલ એથી પણ ઠંડું!” 😄
વાંચન વિશેષ ~
“સબર” (صبر)
એક અરબી શબ્દ છે.
એનો સામાન્ય અર્થ થાય:
ધીરજ, સહનશક્તિ, શાંતિથી પરિસ્થિતિ સ્વીકારવાની શક્તિ.
પણ “સબર” ફક્ત ચૂપ રહી જવું નથી.
એનો ઊંડો અર્થ એવો પણ થાય કે:
ગુસ્સા સમયે પોતાને કાબૂમાં રાખવો
મુશ્કેલીમાં હિંમત ન હારવી
ઉતાવળ ન કરવી
દુઃખમાં પણ વિશ્વાસ જાળવવો
સારા પરિણામ માટે શાંતિથી રાહ જોવી
ઇસ્લામિક પરંપરામાં “સબર” બહુ મહત્વનો ગુણ માનવામાં આવે છે.
જેમ પ્રસ્તુત વાર્તામાં ફાતિમા બેગમ કહે છે:
“અલ્લાહનો દૂત, પ્રેમથી બોલો.”
એમાં સબરનો ભાવ છે.
ગુસ્સા સામે શાંતિ રાખવી.
ગુજરાતીમાં નજીકના અર્થવાળા શબ્દો:
ધીરજ
સહનશક્તિ
શાંત મન
સંયમ
અને હસીને કહું iતો 😄
“ગરમ મગજ પર ઠંડું ઢાંકણ મૂકી દેવાનું નામ — સબર!”
~~~
ડિસ્કલેમર.
આ વાર્તા સંપૂર્ણપણે કલ્પિત હાસ્ય-બોધ રચના છે.
વાર્તાના તમામ પાત્રો, સ્થળો, સંવાદો અને પ્રસંગો માત્ર મનોરંજન અને જીવનમાં “સબર” તથા શાંતિનો સંદેશ આપવા માટે રચવામાં આવ્યા છે.
કોઈપણ વ્યક્તિ, સમાજ, ધર્મ, વિસ્તાર અથવા વ્યવસાયની ભાવનાઓને ઠેસ પહોંચાડવાનો કોઈ આશય નથી.
વાર્તામાં દર્શાવાયેલ રમૂજી ભાષા અને સ્થાનિક બોલી માત્ર હાસ્ય અને સુખી જીવનની સરળ સમજ માટે ઉપયોગમાં લેવામાં આવી છે.
