તસવીર મળે
તસવીર મળે
મને ક્યાંકથી એમની જો તસવીર મળે,
આ તરસ્યા નયનોને પછી જરા કળ વળે,
શોધવા નીકળું હું ઉજાસ ખુશીઓનો અહીં,
અંધારી કેડીઓમાં પછી મને આગિયા મળે,
લખવા બેસું હું ગઝલ વિષય રૂપનો લઈને જો,
એમની રેશમી લટે જ મને બે-ચાર શે'ર મળે,
જામને પીવામાં જ્યારે ન રહી હોય કશી મજા,
ને ત્યાં જ એવું બને એમના હોઠ શરાબી મળે,
એમના આગમનની વાટ જોઈ બેઠો રહું દિનભર,
ને રાત્રે આવીને ધીમેથી મને એ સપનાંમાં મળે,
રોજ આપું પાણી છતાં સૂકાભઠ રહે ઉપવનો,
ને જો એમના પડે પગલાં તો ફૂલોને વસંત મળે,
એમને ખોજવા બધે ય ફરી વળું 'પ્રેમનિર્ઝર',
ને જાઉં જો મારા હૈયામાં તો એ મને સામા મળે.