સુંદરી ઝરૂખે
સુંદરી ઝરૂખે
સદ્યસ્નાતા સુંદરી એક ઊભી હતી ઝરૂખે;
શશી પણ ઝાંખો દીસતો હતો આભ ઝરૂખે !
ઊડતી અલકલટ સંગ ખેલતો હતો સમીર;
દ્વેષે બળતો હતો આશિક, ક્રીડા જોઈ ઝરૂખે !
સ્વપ્નપરીને જોઈ અટારીએ, રોજ કરતો ઈશારા;
સરી જતી કન્યા ભીતરે, મચકોડી મોં ઝરૂખે !
એકદા ઉલાળી નયન, સુંદરીએ ફેંક્યું સ્મિત પ્હોળું;
બેહોંશ થતાં માંડ બચ્યો, આનંદે તાકી રહ્યો ઝરૂખે !
'સટાક' ઊઠ્યો ધ્વનિ, કોમળ અંગુલી છપાઈ ગાલે;
સ્વપ્નમાં પોતે હતો જ્યારે, સુંદરી સંગ ઝરૂખે !
હાસ્યના છૂટ્યા ફુવારા, છળી મર્યો એ લોકલાજે,
ગર્વિલી સુંદરી વક્ર ઓષ્ઠે, ઊભી હતી ઝરૂખે !