થઈ જા ને ભૈ
થઈ જા ને ભૈ
મારા માધવની મોરલી સમ મીઠો, તું થઈ જા ને ભૈ;
ધરી મુખે મીઠી વાણી જગનો વ્હાલો, તું થઈ જા ને ભૈ !
પચાવી મૃદ, માતને મુખે કરાવ્યું વિશ્વદર્શન;
ગોપિત વાતો અવરની પચાવતો, તું થઈ જા ને ભૈ !
પૂતના હણી, પાપી કંસને પહોંચાડ્યો સ્વધામ;
રાક્ષસી વૃત્તિને મનની, હણતો તું થઈ જા ને ભૈ !
ટચલીએ ધર્યો ગોવર્ધન, હંફાવી વર્ષારાણીને;
આફતોના લશ્કરને હંફાવતો, તું થઈ જા ને ભૈ !
કીધાં શમણાં ગોપીઓનાં મૂર્ત, યમુના તટે;
તારાં સૂતેલાં સપનાંને સાકાર કરતો, તું થઈ જા ને ભૈ !
સત્યની સાથે રહી, અસત્યનો નોતર્યો વિનાશ,
જગતના નાથમાં વિશ્વાસ રાખતો, તું થઈ જા ને ભૈ !
વેરાન વગડા સમ સરકતી આ જિંદગીમાં;
પામવું જો કંઈક હોય, ગીતા વાંચતો તું થઈ જા ને ભૈ !