સીધી સાદી ગઝલ

સીધી સાદી ગઝલ કહું તો પરંપરાની લાગે;

ન સમજાતાં ગણિત કોઈ પગે કપાસી લાગે.

અંદરથી ઊભરે જે ઊર્મિ કહે સતત એ લખવું; 

એવું લખતાં થયા કરે કે ખભે નનામી લાગે.

દરજી છીએ; સુથાર છીએ કે સમણાંના શાયર ?

શબદ વેતરું; છોડા પાડું ધરા અજાણી લાગે.

ગ્રાહક વિણ વેચાવા મૂકી જાત ઝળાળાં - ઝળહળ -

સાંજ ઢળી ત્યારે જોયું તો જાત જ ઝાંખી લાગે.

કોઈ કહે કે ઉમદા શાયર હાથવગા છે અમને -

પંડિત-પોથી બીજાં કાજે રોજ સજાવી લાગે.