શત શત પ્રણામ

જન્મ આપીને ઉછેરી મોટા કર્યા,

એવી મારી મા જનેતા તને શત શત પ્રણામ.

પોતે પી વિષ અમી અમને ધર્યા,

એવી મારી મા જનેતા તને શત શત પ્રણામ.

પરાકાષ્ઠા પ્રેમની એ છે જનેતા,

ઉરે મબલખ અમરત ભર્યા;

જેના ઋણ ચૂકવવા નાના પડ્યાં,

એવી મારી મા જનેતા તને શત શત પ્રણામ.

થાય પ્રતીતિ સ્વર્ગની પગ તળે,

ગુણ ગેરહાજરીમાં સાંભર્યા;

પુનઃ ન સંસારે કોઈ એવાં મળ્યાં,

એવી મારી મા જનેતા તને શત શત પ્રણામ.

ઈશ પણ ના આંબી શકે ઉંચાઈ,

હરિ પણ અંકને સદા ઝંખ્યાં;

માનવ રૂપે જ્યાં પરમેશ સાંપડ્યા,

એવી મારી મા જનેતા ને શત શત પ્રણામ.

એવી મારી મા જનેતા તને શત શત પ્રણામ.