શીખું છું
શીખું છું
કહેવાને તો શિક્ષક છું,
પણ હકીકતમાં તો યાચક છું
નાનકડા ભૂલકાં પાસેથી
હું રોજ નવું નવું શીખું છું !
પળમાં કિટ્ટા પળમાં બુચ્ચાં
લાતમ લાતા ઘૂષમ ઘૂષા
નાનકડા મીઠાં ઝગડામાં
નિ:સ્વાર્થપણાને નીરખું છું
હું રોજ નવું નવું શીખું છું !
આ તારું આ મારું કરતા
થોડામાંથી વહેંચી ખાતા
નાની નાની હથેળીઓમાં
ઉદારતાને દીઠું છું
હું રોજ નવું નવું શીખું છું !
જવાબ દેતા, પ્રશ્નો કરતા
મોટા મોટા થોથાં પઢતા
મોતી જેવા નેત્રોમાં હું
જીજ્ઞાશાને દેખું છું,
હું રોજ નવું નવું શીખું છું !
કવિતા ગાતા, પ્રાર્થના કરતા
લોકગીતોમાં ડૂબી જાતા
લાડીલા એ કવિજનોનાં
શ્રદ્ધાભાવને ઓળખું છું
હું રોજ નવું નવું શીખું છું !
સાતતાળી, અડકો દડકો
પકડાઈ જાય તો કરતા થપ્પો
હસતા રમતા બળદેવોમાં
મારાં બાળપણાને અળકુ છું
હું રોજ નવું નવું શીખું છું !