રાજકુમાર
રાજકુમાર
હું છું રાજા ઘર તણો, તું છે રાણી આંય
રાજકુંવર જો આપણો, ઘોડે ચઢતો જાય
ભણી-ગણીને પાંગર્યો, આબરૂ થઈ સવાઈ
સગા-સંબંધી કે મને, સારાં કરમ છે ભાઈ
ચાલ,બજાવીએ ઢોલ હવે, વગડાવીએ શહેનાઈ
તારી-મારી બાદમાં, નામ એનું લે’વાય
આવી ઘર એ સાંભળશે, તું દેજે સલાહ કાંઇ
થઈને સાસુ આજ તું ? કેવી છે હરખાય !
ના,જવા દે’ એમને, ભાવિ રૂડું થાય
બેટા, વિદેશ જઇને ફરી, ફોન તું કરજે કાંઇ
એ પહોંચ્યાં કે ભુલી ગયાં ? ના ફોનના લાગે આંય
પણ, ફોનના લાગે તો, કાગળ ભી કંઈ લખાય
ગયાં મહિને આવ્યાં’તાં, આ મહિનાથી નહીં થાય
મમ્મી-પપ્પા તમે સમજો છો ? આ નવી જગા છે ભાઈ
આજ સુધી આ રાજ હતું, ને હવે દિવાલો દેખાય
પહેલાં વરસાદે વરસી પડે, ને પુર આવે ઘર માંહ
રાજકુંવર વિસરી ગયો, રાજ-કાજ કાં ભાઈ ?
વકીલ આવ્યાં નોટિસ લઇ ! આ કોની જગા છે ભાઈ ?
અમે ચાલ્યાં પાસના મંદિરે, ને એ બ્રાહ્મણ કેવો હરખાય ?
હું કહું છું હરિ કે કૃપા કરો, કોઈ સ્નેહીજન મળી જાય
બેટા, આજથી મારો પુત્ર છે લે, જગા આ તારી થાય
પણ, જેવો છે તેવો રહેજે, નહિ તો રદ કરીશ હું શ્યાહી
એણે પગ આ પૂજ્યા કહે, કાંઈના જોઈતું રાય
આપ મળ્યાં એ ધન ઘડી, બસ,આશિષ આપો કાંઈ
હું રાજા મંદિર તણો ને, તું છે રાણી આંય
રાજ કુમાર જો આપણો, ઝોળી ભરતો જાય !