Library
ઓ મદ ઘેલા
ઓ મદ ઘેલા
કીડીને ય તલવારથી મારે છે ?
ઓ મદ ઘેલા, તું કેવું પાપ આણે છે !
ખામીઓ તો તુજમાં ય હશે જ,
વાંક જોવાની આ કેવી રીત જાણે છે !
ઓ મદ ઘેલા...
જે તડપે છે એને જ તડપાવે છે ?
ઘણાં મન રીબાવીને કરવા શું ધારે છે !
કોક' દિ તારું ય હૈયું તડપશે જ,
પીડા દેવાની આ કેવી રમત માણે છે !
ઓ મદ ઘેલા...
અમથો એ દરિદ્ર ક્યાં અમીરી માંગે છે ?
ઠારવા અગ્નિ જઠરે, બટકું જ તો યાચે છે !
જાણે છે એ ખોટો નથી માંગણીથી,
સૃષ્ટિ થકી છે એને ય હક છતાં ભીખ માંગે છે !
ઓ મદ ઘેલા...
હું મોટો હું ઘણો લાયક કેમ એવું રટે છે ?
મોટો છે 'નાયક ' પ્રભુ, ક્યાં કદી એવું વદે છે !
અફાટ બ્રહ્માંડે નથી ટપકું ય છતાં,
રચનાકારની મૂરત તું મરજી મુજબ ઘડે છે ?
ઓ મદ ઘેલા...
સમજવાનું છે તારે ને તું જ એને સમજાવે છે ?
દાનપેટીમાં ધરી રૂપિયા તું એને મનાવે છે !
કર્મ કરીને સારાં, થશે એ રાજી જાણે છે,
ઢાંકીને તવ દોષો ખુદને સારામાં ખપાવે છે ?
ઓ મદ ઘેલા...
