નારી તારી દશા
નારી તારી દશા
પ્રેમ તું સૌનાં પર વરસાવતી
પણ પ્રેમ માટે તું સદા તરસતી
નારી તારી આ દશા કેવી છે અટપટી ?
હૈયાના હેતથી સૌને તું ઝુલાવતી
તારા વિના જગને શાંતિ ન મળતી
નારી તારી આ દશા કેવી છે અટપટી ?
તારા આચરણથી ઘર સ્વર્ગ બનાવતી
ઘરમાં તારી મરજી જરા ન ચાલતી
નારી તારી આ દશા કેવી છે અટપટી ?
નાનાં મોટાં સૌનું માન સન્માન જાળવતી
સદા તારા અપમાનને સહન કરતી
નારી તારી આ દશા કેવી છે અટપટી ?
તારા થકી સૃષ્ટિ નિર્માણ કરતી
સૃષ્ટિ તને જ નિર્બળ ગણતી
નારી તારી આ દશા કેવી છે અટપટી ?
બાપના હૈયાના ટુકડો ગણાતી
બાપને માટે પરાયું ધન બની જતી
નારી તારી આ દશા કેવી છે અટપટી ?
જે આંગણે તું ઘર ઘર રમતી
એ આંગણ જ સદા તું છોડતી
નારી તારી આ દશા કેવી છે અટપટી ?