મુસાફરી

દૂર ઘણી છે મંઝિલ મારી,

નવલો છે મારો પંથ;

કાચી કેડીની સવારી,

માર્ગદર્શન માટે નથી કોઈ ગ્રંથ.

હૈયામાં છે હામ ભરી,

સાથે લીધો ઊમંગ;

આત્મવિશ્વાસ એમાં ઉમેરી,

ભરપૂર કેળવ્યો ખંત.

મહેનત કરું છું પૂરેપૂરી,

મહત્વાકાંક્ષા છે અનંત;

રોમરોમમાં જ્વાળા પ્રસરી,

લાગુ છું જીવંત.

રાખું એટલી તકેદારી,

અવરોધી દૂર રહે અત્યંત;

બાજુ મૂકું હું દુનિયાદારી,

તે રાજા હોય કે રંક.

ભૂલચૂક લઈશ હું આવકારી,

સુધાર કરીશ તુરંત;

આગળ વધવાની ધગશ મારી,

રાખીશ નહીં કોઈ રંજ.

લક્ષ્યની લીધી જવાબદારી,

આશા છે થઈશ હું યશવન્ત;

અંતરમનની આ મુસાફરી,

પ્રેરણા આપે સંત મહંત.