મેહુલો જિદે ચડ્યો
મેહુલો જિદે ચડ્યો
આપ્યું તને જરાં અમથું આમંત્રણ,
કર્યા તે મેહુલા બારે મેઘ ખાંગા,
અનરાધાર નહીં ઝીણા ઝરમરે વરસ,
શીદને ચડ્યો તું આટલી જિદે મેહુલા ?
ખળખળ વહેતી શાંત નદી આવી બે કાંઠે,
ધકેલે દૂર પાણીને ઉછળતો સાગર,
રિઝવે જગતાત ને નાના બાળ,
શીદને ચડ્યો તું આટલી જિદે મેહુલા ?
ધરાઈને ધરા બની આજ ગુમસુમ,
ભૂખ્યા પશુ, પંખીઓ છૂપાયા ઝાડ ઓથે,
વિનવે આજ ખુદ મોરલા ને ચાતક,
શીદને ચડ્યો તું આટલી જિદે મેહુલા ?
ડર્યો સૂરજ પણ ઘનઘોર અંધારે,
ખોરવાયો જનસૃષ્ટિનો જીવન વ્યવહાર,
રે'વા દે તું એમ જ ધરાનું લીલું પાનેતર,
શીદને ચડ્યો તું આટલી જિદે મેહુલા ?
કરીશ જો બંધ તું હેલીએ વરસવું,
કરું તારા બધા જ ગુનાને માફ,
સમજાવે "રાજુ" બે કર જોડી,
શીદને ચડ્યો તું આટલી જિદે મેહુલા ?