Library
Profile
મારી વાતો સાંભળો ને !
મારી વાતો સાંભળો ને !
એમાં હતી મજા કેવી !
સવારે જાગીને લીમડાનાં દાતણ ને,
ટીપવાની હતી મજા કેવી !
લુંગડાની થેલી ને પાટી પેન લઈને,
ભણવાની હતી મજા કેવી !
પાવલીના ભૂંગળા આંગળામાં પરોવીને,
ખાવાની હતી મજા કેવી !
બટુક માસ્તરની ચોટી ને,
સોટીનો સણસણાટ હતી મજા કેવી !
નિશાળ છૂટ્યાની,દફતર ફેક્યાની,
ગીલી દંડે રમવાની હતી મજા કેવી !
ભણવામાં જીરો ને કામમાં હીરો,
બહેનનો વીરો હતી મજા કેવી !
ભાઈબંધ મારો પાક્કો દેય ધક્કો,
ગોઠણ ભાંગ્યાની હતી મજા કેવી !
કોઈક ધનિક પાસે ટીવીને,
રેડિયામાં કોમેન્ટ્રી સાંભળવાની હતી મજા કેવી !
ગામની શેરીમાં આઠા આનામાં કલાક ભાડેની,
સાઇકલ ફેરવવાની હતી મજા કેવી !
તું આંબે ચડ ને રખેવાળ મને મારે,
ઈ કેરીના ગોટલાની હતી મજા કેવી !
ખેતરને શેઢે કાલું ગોળ બનાવે ને,
શેરડી ચોરવાની હતી મજા કેવી !
નળિયાના બળદ બનાવીને,
ઘર ઘર રમવાની હતી મજા કેવી !
ખેતરે કોષ હાંકવાની ને,
ગોફળ ફેંકવાંની હતી મજા કેવી !
બાવળના મીઠાં પૈડા ખાવાની ને,
ઝાડવે હીંચકવાંની હતી મજા કેવી !
કોઈના લગનમાં ઢાંબાના લાડવા ને બરફીના બટકા,
ખીસ્સામાં નાખવાની હતી મજા કેવી !
લીપેલી ગારના ઘરને, ચોમાસામાં નીતરતાં નળિયા,
તોય રહેવાની હતી મજા કેવી !
પાકેલા ચીભડાંનું શાક ને,
પથરાંના ઘંટલે દળેલ રોટલાની હતી મજા કેવી !
લેશનમાં “ઢ” ને તોફાનમાં ટોપ,
પપ્પાના મીઠાં ઠપકા ખાવાની હતી મજા કેવી !
કદી કાંટો ન વાગે એવા ટાયરના ચપલા ને,
રફુ કરેલ કપડાં પહેરવાની હતી મજા કેવી !
લખતાં ન ખૂટે શબ્દોની યાદો ને, વાતોના વાવેતર,
કેમ કરી સમજાવું ડીઝીટલયુગને હતી મજા કેવી !
