લીમડાની ડાળોમાં
લીમડાની ડાળોમાં
1 min
2.0K
લીમડાની ડાળોમાં લૂમઝૂમ લીંબોળી મસ્તીથી હિંચકાઓ ખાય છે,
વાસંતી વાયરો જયાં અડકે જરાક ત્યાં તો આખુંયે ઉપવન મલકાય છે,
રસ્તાને અડકીને ચાલતા આ રસ્તાઓ,
હાલચાલ પૂછે છે ગામના,
ઝરણાના જળને બે કાંઠાઓ કહે છે,
કે છેટા રહીને શું અમે કામના ?
ગાડાની ઘુઘરીથી આખાયે પાદરમાં રણઝણઝણ રણઝણઝણ થાય છે,
વાસંતી વાયરો જયાં અડકે જરાક ત્યાં તો આખુંયે ઉપવન મલકાય છે,
વડલાને પૂછે છે વડલાની વડવાઈ,
થઈ ગયું તળાવ કેમ ખાલી ?
વડલો કે એના છલકાવાની મોસમ તો,
ક્યારનીયે ગઈ છે ભાઈ ચાલી,
સાંભળીને ઉત્તર આ વડલાની વડવાઈ મનમાંને મનમાં મૂંઝાય છે,
વાસંતી વાયરો જયાં અડકે જરાક ત્યાં તો આખુંયે ઉપવન મલકાય છે.