કલમની ધાર

થાય એવું કે કલમની ધાર કાઢું,

જે ભર્યો છે ભીતરે તે ભાર કાઢું .

છે ભરેલી વેદના સંવેદનાઓ,

ડૂસકાં ડૂમાને અપરંપાર કાઢું .

સ્થાન દિલમાં જોઈએ છે જો તને તો,

લાવ તારા નામનો આધાર કાઢું .

ખળભળે ખારાશ મનમાં ક્યાંક ખૂણે,

બાઝશે મન પર તે પ્હેલાં ખાર કાઢું. 

જગથી સંતાડી હતી પળ કેટલીયે,

ખૂબ ગમતી યાદ છે બે-ચાર કાઢું .

તાર દિલના રણઝણે તું જો મળે તો,

સંગ તારે જોડવાને તાર કાઢું .

ના કદી દેખાય પણ પડતો રહે છે,

છો પડ્યો પણ તે સમયનો માર કાઢું.