કાંગસિયાણીનું ગીત
કાંગસિયાણીનું ગીત
કાંગસિયાના થેલામાં છે ઉજળી કાળી મેશ
કાંગસિયાણી કહેતી કે હું જાણું ના લવલેશ
આ કેવી ઉજળી મેશ ....
ગામ - ગામ ને શેરી - શેરી સાદ કરીને ફરતી
ટાઢ હોય કે તાપ ભલેને મન મૂકી વિચરતી
નાની - મોટી કાંગસિયુમાં ઉઘડે મારો વેશ ......
આ કેવી ઉજળી મેશ ....
ધરા ઉપર છે વાસ અમારો , ઓઢી લઈ આકાશ
ઉજ્જડ વગડે ચોકીદારી શ્વાન કરે ચોપાસ
કસબો નાનો હોય ભલેને તોયે ઉજળો ખેશ ...
આ કેવી ઉજળી મેશ ....
આંખ્યુંમાં આંજીને થાતી આંખડિયું અણિયાળી
કાંગસિયુનાં કાપે - કાપે કેશ ખુલે દઈ તાળી
દાંતો એક તૂટ્યો તો જાણે છૂટ્યો મારો દેશ .....
આ કેવી ઉજળી મેશ ....