જીવન જંગ

જીવનની બાજી, ના હારી જવાય,

અડીખમ રહીને, એનો સામનો કરાય,

ઝુકાવે જો જંગમાં, તો જીતનો ઉમંગ છે,

નહીં તો આ જીવન, સદંતર બેરંગ છે,

જીવન ઝંઝાવાતથી, જરી ના ડરાય,,,

અડીખમ રહીને, એનો સામનો કરાય,

આંધી ને તોફાને, પરવશ ના થાવું,

સતને મારગથી, ચળી નવ જાવું,

તોફાનો શમતા તને, કિનારો દેખાય,

અડીખમ રહીને, એનો સામનો કરાય,

વીજળીના ચમકારે, મોતી પરોવવા,

ગડગડાટ જંગ કેરા, ડંકા સમજવા,

જીવનના જંગ મહીં, સમતા રખાય,

અડીખમ રહીને, એનો સામનો કરાય,

હરિવરનું નામ, હામ હૈયાને આપશે,

સંચિત થયેલાં તારાં,  કર્મોને કાપશે,

કાંટાળા મારગ પર, ફુલડાં વેરાય,

જીવન ઝંઝાવાતો, જીવનને ઘડતાં,

કપરા ચડાણ, કોક વીરલાઓ ચડતાં,

શિખરે પહોંચીને, નંદી હરખ ન માય.