ઈનામ

ખુદા તો છે પાક રુહથી થયેલી નેક ઈબાદતનું ઈનામ,

ને આઝાદી તો છે સરહદે જવાનોની શહાદતનું ઈનામ !

અચાનક જ કદી નજરની ધૂપ પડે જો સૌંદર્ય પર,

પછી અલગારી ઈશ્ક છે એ નમણી નજાકતનું ઈનામ !

ભલે ને લાખ ઈલજામ આપે જમાનો અમારી ગુસ્તાખી ઉપર,

કાયમ જ તીખી તહોમત છે અહીં મહોબ્બતનું ઈનામ !

માલામાલ જ થયો છું દિલોજાન દોસ્તોના નિ:સ્વાર્થ પ્રેમથી,

છે નેહથી નીતરતી મારી પર રબની રહેમતનું ઈનામ !

દીકરીને વળાવીને બેઠેલા એક બાપને જુવો તો ખબર પડે,

આંખના આંસુઓ છે કાળજાના કટકાની રૂખસતનું ઈનામ !

નથી મરજી હવે કોઈ જ ધન દોલત મેળવું આ ઉંમરે,

તોય ઉભરાય ઝોળી આનંદથી,કેવું આ કિસ્મતનું ઈનામ !

નથી જોવો "પરમ" તોય દેખાય રહ્યો ચો તરફ એ જ મને,

એ તો છે હોશથી પામેલા મારા જ "પાગલ" પનનું ઈનામ !