હવે

હામ છે ખમવાં ઘણી બંદૂકની ગોળી હવે.

લાશના ઢગલા થશે આ ખૂન જો ખોલી હવે.

કે કહી દો દુશ્મનોને આ ભણી આવે કદી,

દેશ કાજે જીવ પણ આપી જશું બોલી હવે.

ન્હોર આ સાવજ સમાં છે કાળજાઓ નોંચવા,

દાઝથી તીખું પછી જો બોલશો તોલી હવે.

રક્તના ટીંપે ઘણી મોંઘીય આઝાદી મળી,

ને ફકીરો આપતાં 'ગ્યાં પ્રેમની ઝોળી હવે.

જો ઘણુંયે ખેલતાં'તા લાલ રંગે એ બધાં,

લાલ પીળી ઉજવાતી હાલ તો હોળી હવે.

સજ્જ બેઠાં સૈનિકો કશ્મીરની છે ગોદમાં,

શાંત આ મારા નગરને જો તુંય ડહોળી હવે.

કેસરીએ શાન, નિર્મળતા ધવલ રંગે મળી,

રંગ ધરતીએ ધર્યો, લીલાશને ચોળી હવે.