હવે અમે આનંદ કરીએ

હવે અમે આનંદ કરીએ

હવે અમે આનંદ કરીએ, પરમાનંદ કમાઇ,

હવે અમે સાનંદ ફરીએ, શાંતિ ચિરંતન પામી... પરમાનંદ કમાઇ !

ખરચી ખૂટે, ચોરે લૂંટે, ધનની કરી કમાઇ,

એ તો કેમે કરી ન ખૂટે, દિવસરાત વધનારી... પરમાનંદ કમાઇ !

કાટ ન લાગે, મેલ અડે ના, એવું કાંચન ભારી,

સાચવવું ના પડે એહને, પામે તે બડભાગી... પરમાનંદ કમાઇ !

ઇચ્છા થતી પૂર્ણ સઘળી, ના દારિદ્રય રહે કાંઇ, 

સકલ સૃષ્ટિની શહેનશાહત મળી જાય વણમાગી... પરમાનંદ કમાઇ !

સત્ય પંથ છે પકડ્યો જેમ પ્રભુની કરુણા માગી,

તેને સંકટ શોક રહે ના, ત્રિતાપ જાય નાસી... પરમાનંદ કમાઇ !

‘પાગલ’ બની પરમ રસમાં ન્હા, બંધન તોડ ધરાનાં,

પામી લે તું પરમધન હવે, મટી જાય દુઃખ સારાં... પરમાનંદ કમાઇ !

- શ્રી યોગેશ્વરજી