હરિના ઉત્સવ

રઢિયાળી રાત, સજતી શણગાર, ટમટમે તારલાની ભાત,

ધુમ્મર ચાલે, મહાલતી વહાલે, વરઘોડાની વરણાગી ચાલ

ઓવરણાંએ હરખ્યું પ્રભાત અંતર મંદિરીએ

હરિ નિત ભાળું ઉત્સવ તારા આંગણિયે,

ચાંદનીના ચંદરવે સાગરનાં શમણાંએ, ઊછળતો નૃત્યોનો નાદ

મોંઘેરાં મોતીનો થાળ ભરીને, ગજવો રે શંખોના સાદ

અવની અંબરના મધુરા મેળ અમે માણીએ

હરિ નિત ભાળું ઉત્સવ તારા આંગણિયે,

વીજના હાર હીરલે વાદળ દંદુભીએ, આછેરા દેવ તમે ઝૂમજો

ઘેરા નાદે વગડો વંઠાળીને છાતીએ સુસવાટા ના તણાવજો,

આવડા હરખે હરજી તાંડવ ના પલાણીએ

હરિ નિત ભાળું ઉત્સવ તારા આંગણિયે,

ઝરમર ઝરમર ઝીલીએ અમીને, વ્યોમેથી વરસે રે વહાલ

ખળખળ સાદે સંગીતના તાલે, કુદરત છેડે રે સાજ

પથ્થરમાંથી પ્રગટતા સંગીતે અમે ડોલીએ

હરિ નિત ભાળું ઉત્સવ તારા આંગણિયે,

સુમન શણગારે રેશમ ગાલીચે મહેંકતું મઘમઘી જંગલ

ચૈતન્ય ઝીલે આનંદ મંગલ ને ઊછાળે ઉમંગ અનંગ

ભાવ નજરિયે અંતરમાં આશરો ઝીલીએ

હરિ નિત ભાળું ઉત્સવ તારા આંગણિયે.