હોળી
હોળી
મુઠ્ઠીમાં રંગ ને મનમાં ઉમંગ,
ખીલ્યો છે ફાગ આજ કેસુડાને સંગ.
સ્નેહે ભીંજાય આજ પ્રેમબંધન,
હર્ષ-ઉલ્લાસથી નાચે તન-મન.
સાજનના સ્પર્શે રંગાય છે ગાલ,
હૈયે વેરાય આછા અબીલ-ગુલાલ.
ટહુકા ગુંજે, સંગ વેણુનો નાદ,
કીકીનો કેફ પાડે સાજનને સાદ.
શમણાંનો રંગ અંગ-અંગ ઘૂંટાય,
આશ્લેષની સુવાસ અંતરે લૂંટાય.
જગતની જંજાળ વિસરી જઈએ ભેટી,
હાલ સાજન ઉજવીએ હોળી-ધુળેટી.
એકમેકના શ્વાસનો કરીએ પ્રવાસ,
જોડે વિહરીએ ઊંચા રંગીન આકાશ.
અહીં-તહીં મેઘધનુષી રંગો છંટાયા,
બાહુપાશમાં તરબોળ પ્રીત-પડછાયા.