ભીતરની વેદના

આ હૈયાનો ઉત્પાત,

આ ભીતરની વેદના,

આ ભીતરની સંવેદના,

જો ને ઉલેચાય આમ શબ્દો બની,

ભીતર વેદના શૂળ સમ ખૂચે,

પણ તોયે આ ચહેરો ફૂલ સમ હસે,

આ ઉત્પાત સર્જે ઉથલ પાથલ,

આ માનવીને કરી દે છે પાગલ,

હૈયે હોય ઉત્પાતતો માનવી રાતભર જાગે,

એકલતા ગમે એને, મહેફિલથી દૂર એ ભાગે,

આ વાદળ અને પર્વત પણ સર્જે ઉથલપાથલ,

અતિ વર્ષા અને જવાળમુખી થકી ધરા પર ઉથલપાથલ,

કદાચ પૃથ્વીની ભીતર પણ હશે દર્દભરી વાત,

એટલે જ ધરતીકંપ થકી કરતી હશે ભયંકર રજૂઆત,

સમંદરના હૃદયમાં પણ થતો હશે ઉત્પાત,

સુનામી થકી કરતો હશે પીડાની રજૂઆત !

પ્રકૃતિને પણ થતી હશે પીડા કદાચ,

એટલે જ આ ફૂલો આંસુ સારતા હશે કદાચ,

એટલે જ ક્યારેક પવન આમ ગાંડોતૂર થતો હશે !

નદીઓ બેકાબૂ થતી હશે !

આકાશ પણ ગર્જના કરતું હશે !

વૃક્ષો બધા તાંડવ નૃત્ય કરતા હશે !

ઉત્પાત થતો હશે માનવીની ભીતરમાં પણ,

એટલે જ દુનિયામાં ગઝલો રચાતી હશે !