બહેની મારી.

સૂવડાવી હિંચકામાંને ઝૂલાવતી બહેની મારી.

હાલરડાં હેતથકી સંભળાવતી બહેની મારી.

જો હું ક્વચિત્ રડું તો વારેવારે એ મનાવતી,

રમતમાં પોતે હારીને જીતાડતી બહેની મારી.

અધૂરું લેસન મારું પાસે બેસીને લખાવતી, 

પરીક્ષા ટાણે શુકન અપાવતી બહેની મારી.

કદીક માતપિતા સંગ વાદવિવાદે રીસામણા, 

પક્ષ મારો ખેંચીને એ પટાવતી બહેની મારી.

જતાં શહેરમાં અંગુલિ મુજ ગ્રહીને ધપતી,

વળતાં ભાવતો ભાગ અપાવતી બહેની મારી.

આવી વેળા એકદા એને શ્વસુરગૃહે જવાની,

સર્વસ્વ હરીને નૈનને વરસાવતી બહેની મારી.