અંતરની ઝાંખી

આ જીવનના ભ્રમને સઘળા તોડાવે અંતરની ઝાંખી,

આ ફેરા એ ચોર્યાશીના છોડાવે અંતરની ઝાંખી.

આખું જીવન ખોયું મારું મારું બોલી ફોગટ મોહી,

આ મારા તારાનો ભેદજ ભૂલાવે અંતરની ઝાંખી.

ધનની લાલચ રાખી લોભી થઈ કર્યા કર્મો સૌ ખોટા,

આ લોભી લાલચને છેદી છેદાવે અંતરની ઝાંખી.

સઘળું મારાથી શક્યજ એ ખોટા માનસમાં ભમ્યો હું,

આ ખોટા મનને હરિહરમાં મીલાવે અંતરની ઝાંખી.

આખું જીવન હું ને તું કરતું રહ્યું મન મિથ્યા જગમાં,

આ હું ને તું નો ભ્રમ તોડી, ખીલાવે અંતરની ઝાંખી.