અલૌકિક

હોય ન કદી શરીરરુપી મિલન,

ક્ષણભંગુર એ તો !

દિવ્ય તેજોમય આત્મા સુધી,

સ્પર્શી જાય સ્નેહ તો !

એ પ્રેમળ અનુભૂતિ, હોય અલૌકિક! 

સાચા મનથી જોઈ હોય,

જો અત્યંત પ્રિયની રાહ તો !

હરદમ મધમધતું સ્મિત હરખાય,

પ્રિયની મળી જાય વાહ વાહ જો !

એ પ્રેમળ અનુભૂતિ, હોય અલૌકિક !

વાંસળીરુપી જીવનને મધુ લયથી,

સંગીતમય કરી લે જે સંગીતકાર !

તેજ ખરો અભિનય કરી,

સૃષ્ટિના દૃશ્યમાં થાય ચિત્રકાર !

એ પ્રેમળ અનુભૂતિ, હોય અલૌકિક !

શબરીના એંઠા બોર ખાઈને,

રામ ભક્તની સમીપ ગયા ! 

ઝેરનું અમૃત કરી મીરાંની કરી રક્ષા

શ્યામ ભક્તિરસમાં એકરુપ થયા !

એ પ્રેમળ અનુભૂતિ, હોય અલૌકિક! 

હે ઈશ ! તારારુપની તેજ દિવડી,

બને સ્વપ્ન જગની કેવી !

માધવ મટુકી(દેહ) થાય રસીલી,

'સ્વપ્નીલ'ની લગની તો એવી !

એ પ્રેમળ અનુભૂતિ , હોય અલૌકિક!