આપણો આધાર છે
આપણો આધાર છે
આપ્યું ઘણું છે મા તમે, ક્યાં કોઈને દરકાર છે ?
સોંપ્યો ખજાનો હાથમાં, ક્યાં આંખમાં આભાર છે ?
જંગલ ઘણાં કાપ્યા અને બાંધી સડક ડામર તણી,
ઊંચે ઊડ્યા આકાશમાં સપનાં થયાં સાકાર છે,
ફૂલો તણી મોસમ અને ઝાકળ સમું જીવન બન્યું,
પૃથ્વી તણા આ રાજમાં કેવો અજબ દરબાર છે,
સુખ શોધવા દોડયો ઘણો, પાછળ વળી જોયું નહીં,
ખોદી કબર સંસારની, માનવ થયો લાચાર છે,
વાયુ થયો દૂષિત છતાં આંખો બધાની બંધ છે,
રક્ષણ કરો એ ખોખલા દાવા બધા બેકાર છે,
તારા ખજાનામાં અમે ચેડા કર્યા છે એટલે,
આ પ્રકૃતિના આંગણે ચાલ્યો અધમ વેપાર છે,
ખપ જેટલું સૌ વાપરો, મા આપશે સૌ બાળને
લૂંટશો ના એની લાજને, એ ઈશનો અવતાર છે,
આવો બધા સાથે મળી લઈએ શપથ માનવ બની,
રક્ષા કરીશું માતની એ આપણો આધાર છે,
તો આગને બદલે વરસશે વ્હાલની 'હેલી' પછી,
પૃથ્વી તણા આ બાળનો જાણે થયો ઉદ્ધાર છે.