આપણી જ ધરતી

હા બાળ સૌ ધરાના કાંઈ એકલા નથી,

છે આપણી જ ધરતી કોઈ લૂંટતા નથી,

નાદાનીમાં જો કોઈ એનું ચીરહરણ કરે,

કોઈ કૃષ્ણ આવી ચીર હવે પૂરતા નથી.

ફેલાવ્યું પ્રદૂષણ એવું કોઈ માનતા નથી,

ક્રોધે થયો છે સૂર્ય એ સ્વીકારતા નથી,

વેરાન બન્યું ઈન્દ્રપ્રસ્થ જુઓ જેમના લીધે,

એ દૂર્યોધન આ વાતને ગણકારતા નથી.

પ્રકૃતિની મર્યાદા કોઈ પાળતા નથી,

બેફામ દોડવાનું કોઈ ચુકતા નથી,

મા સુરક્ષિત હોય ના તો પ્રાણ નહીં ત્યજું,

એવી પ્રતિજ્ઞા ભીષ્મ કોઈ રાખતા નથી.

જે આવ્યા એ જવાના કોઈ ભૂલતા નથી,

છો રંક કે રાજા એવું કોઈ જાણતા નથી,

નારાજ થઈ જો સૃષ્ટિ તો તમે યાદ રાખજો,

અસ્તિત્વ ટકાવવાના કોઈ નુસખા નથી.