వరమంటా

నీ వెచ్చని చిరునవ్వే..ఈ జన్మకు వరమంటా..!

నీ చల్లని ఒక చూపే..నా మాటకు వరమంటా..!

తలచకనే పసిడిపూలు..కురిసేవే నా పైనే..

నీ తియ్యని పదముద్రలె..నా తోటకు వరమంటా..!

రేయిపగలు చింతలేక..నిలచేవే నాతోనే..

నీ వీడని ఆ వెలుగే..నా బాటకు వరమంటా..!

పరిమళించు జ్ఞాపకాల..వెన్నెలంటె నీతోనే..

నీ చెదరని అనురాగమె..నా పాటకు వరమంటా..!

గుండెలయల కంజిరాను..పలికించే చెలికాడవు..

నీ కమ్మని భావనమే..నా నీడకు వరమంటా..