Library
Profile
విరహవేదన
విరహవేదన
ఉత్పలమాల.
పెద్దలు చెప్పినన్ వినక వేగమె వచ్చితి నిన్నుగాంచ నా
బుద్ధికి తోచలేదు పరమోన్నత స్థానము నందు నిల్పి నీ
యొద్దకు చేరగన్ గనవు యోచన చేయుచు రావు నా దరిన్
ముద్దుగ నాదరింతువని మూఢతనొందితి వేణుమాధవా!//
చంపకమాల.
వలచితి మాధవా!మదిని బాధలు పొంగెను నీదు రాకకై
నిలిచితి నుస్సురంచు నిను నిష్టురమాడుచు సందె వేళలో
కలతను దీర్పరావ!హరి!కన్నుల కాయలు కాయుచుండె నే
పిలిచితి దీననై వినుము!భీతిలు చుంటిని పొన్ననీడలో!//
చంపకమాల.
సఖుడని నిన్ను తల్చితిని జాగును సేయుట పాడికాదు నీ
విముఖత యేమిటో!తెలుపవే!పసి దానను క్రుంగిపోతి నా
ముఖమును జూడలేవ? నను మోదముగా దరిజేరనీయవా?
సుఖముకు దూరమైతి నిక శోధనలేల? ముకుంద!చాలురా!//
చంపకమాల.
కఱకుగ నన్ను దూరముగ కట్టితి వివ్విధి జామురాతిరిన్
బరుగున వచ్చియుంటి నెడ బాయని వాడవటంచు నమ్మికన్
మరచితి వేల? నా దరికి మక్కువ జూపుచు రమ్ము వేగమే!
సిరిదొర!నీదు కౌగిటను శీఘ్రముగా కరిగించవేలనో!//
