తప్పదుగా

మాట ఇచ్చి వెళ్ళినావు..చూసుకోగ తప్పదుగా..!

ప్రతిశ్వాసా నీలోనే..కలుపుకోగ తప్పదుగా..! 

శరీరాలు దూరమైన..తీరిపోవు బంధమిదా.. 

ఆలోచన నవ్వేనా..పంచుకోగ తప్పదుగా..! 

మానని ఈ గాయంతో..ఎన్ని ప్రేమగేయాలో.. 

పాడుకునే కోకిలనే..పట్టుకోగ తప్పదుగా..! 

చేతులెన్ని చాచినదో..చెప్పలేను అది ఎవరో.. 

సుడిగాలై నువ్వు వచ్చి..చుట్టుకోగ తప్పదుగా..! 

చెలిమికన్న అపురూపం..లేదుకదా ఏ జగాన.. 

తలపుతలుపు గడియపెట్టి..అల్లుకోగా తప్పదుగా..! 

అనుభవాల పంజరాన..సాక్షియైన రాచిలుకను.. 

ఒక్క లిప్తపాటు ఇంక..హత్తుకోగ తప్పదుగా..!