తన మౌనం

చిరునవ్వుల కోవెలలో..దీపమంటె తన మౌనం..!

నిత్యచైత్ర రాగాలకు..కావ్యమంటె తన మౌనం..!

అనుక్షణం ప్రేయసియై..ఊరించే చెలి ఎవరో..

చెలిమిపూల వనసీమల..రాజ్యమంటె తన మౌనం..!

ప్రాణాలకు ప్రాణంలా..ఉన్నదెవరొ చూడవేమి..

గుండెగూటి పాపాయికి..లోకమంటె తన మౌనం..!

పెదవులపై నాట్యమాడు..మెఱుపులతో జగడమేల..

పరిమళించు ఆ చూపుల..గీతమంటె తన మౌనం..!

ప్రవహించే సెలయేఱుల..గలగలలో ఎన్ని కథలు..

క్రీడించే పదసీమల..భావమంటె తన మౌనం..!