రోజాపూలను పూయించి !
రోజాపూలను పూయించి !
ఓ చెలీ ! నీవెక్కడున్నావో తెలియక
ఈరోజు నా గుండె లయలో హెచ్చుతగ్గులు .
అడుగుల సవ్వడులూ వినబడక
చిన్నబుచ్చుకున్నవోయీ ఎన్నడూ లేనంతగా
ముంగిట్లోని తళుకులీను గులాబీలు !
కాసేపు ఇక కంటికి కనిపించవేమోనని ,
మరికాసేపు నీపై నా ఆశలను మరచిపోవని .
నాకేనా ఈ ప్రేమను ప్రకటింపజేసే ప్రహేళిక ?
లేక , ఇది ప్రేమికులందరు
ఏదో ఒక సమయాన ఎదుర్కొనే విరహవీచికా ?
దోబూచులాటలో ఒకరిపై ఒకరికి మరింతగా
ఉద్వేగము పెరిగి , అలకలు తరిగి .
అందుకోవాలనే ఆత్రము మురిపించి ,
అందుకే రేయింబవళ్ళు తపించి
ఇరువురు వెచ్చనికౌగిలిలో ఒదిగి
మనసారా పరవసించి ముచ్చట తీర్చుకోవచ్చనే !
మబ్బుతెరలు తొలగుతూ
కాసే వెన్నెలలో ఎంతో తెల్లదనం ,
వేసవివేడిని తగ్గిస్తూ కురిసే
వానజల్లులోనూ కావలసినంత చల్లదనం .
రోజుకొక కొమ్మకు పూస్తూ పూలు ,
ఉషోదయ కిరణాలు జాలువారగా
అక్కడక్కడా మెరుస్తూ
ముత్యాలను తలపించే మంచుబిందువులు .
రావా ఎదుటకు ! నీ అల్లరి చాలించి ,
రోజాపూలను పెదవులపై పూయించీ !
మాటలమాధుర్యాన్ని నాకందించి ,
మనలో ఆనందానుభూతులను పంచీ !!