ఓ మనసా 💟💟

కలతచెంది రచ్చచేస్తె ఒప్పుకోను ఓ మనసా

కలహానికి కాలుదువ్వ ఒప్పుకోను ఓ మనసా

అలవికాని ఆశలతో యుద్దాలే చేస్తావూ

ఆటవిడుపు ఓదార్పులు పూనుకోను ఓ మనసా

మధువుకోరు మధుపమువలె నిలకడలేక తిరుగుతావు 

 ఆకర్షణల అలజడిలొ చిక్కబోను ఓ మనసా 

ఊహలజడి ఊయలలో పగటి కలలు కంటావూ

కల్లల గాలిమేడలు కట్టబోను ఓ మనసా 

తాడులేని బొంగరమే నీ చలనము ఉరవడులూ

పరుగులెత్తి పాయసాలు తాగబోను ఓ మనసా

కోర్కెల చిట్ట పడగవిప్పి బుసలెన్నో కొడతావు

విషవలయపు దారులలో నడవబోను ఓ మనసా

ఊరించే వాంఛల మధు వనాలలో నీ నడకలు 

అందని ఆ ద్రాక్షరుచులు కోరబోను ఓ మనసా 

గగనంలో తారకలను చేరాలని నీ పయనం

గాలిపటం పట్టుకొనీ ఎగరబోను ఓ మనసా

ఉవ్వెత్తున ఎగసిపడే కెరటానిది తిరొగమనమె

శాంతచిత్త మధురవళిని వీడబోను ఓ మనసా