ఒక ఉత్తరం

ప౹౹

ఉత్తరమే రాస్తున్నా ప్రత్యుత్తరమే కోరుకొని

సత్వరమే సలహా ఈయవా నను చేరుకొని ౹2౹

చ౹౹

ఉభయకుశలోపరి అని నేనూ ఊరించనూ

అభయంమిచ్చేసి అలా మరి అలరించనూ ౹2౹

గుండెలోని గుసగుసలే గురిగా చెప్పేందుకే

ఉండబట్టలేని ఊసులన్ని ఒప్పజెప్పేందుకే ౹ప౹

చ౹౹

మరచిపోని గురుతులు మరల గుర్తించను

చరచి వీపునూ శహబాషని మురిపించను ౹2౹

భాషా పటిమను పటికబెల్లమల్లే ప్రకటించ

ఆషామాషీగా రాయలేనులే అది వికటించ ౹ప౹

చ౹౹

జీవిత అనుభవాలే అనుభవించి రాయనా

కవిత కుసుమాలే కల్పనతో పూయించనా ౹2౹

ఈనాటి కలను విపులంగా విశదీకరించను

ఏనాటికైనా కూలంకషంగాను వివరించను ౹ప౹