నీవైపేచూస్తుంటే

నీవైపే చూస్తుంటే..కాలమసలు తెలియదేమి..!?

వేదించే ఆవేదన..తీరమసలు దొరకదేమి..!?

నువ్వైతే భలేబాగ..నవ్వుతూనె ఉంటావే..

ఈ ఊయల లోన నిదుర..గీతమసలు అందదేమి..!?

తోటలోని ఏ పూవును..కోయాలట నీ సేవకు..

నా మౌనపు కోవెలలో..దీపమసలు పలుకదేమి..!?

అక్షరాల వెన్నెలలో..విహరించే పనేమిటో..

నీ వెచ్చని చూపులలో..భావమసలు తోచదేమి..!?

మాయచేయు మాటలలో..ముంచెత్తే అల్లరేల..

అల్లుకున్న పరిమళాల..లోకమసలు నిలువదేమి..!?

ఈ మాధవ గజల్ గాక..మత్తుమందు ఎక్కడుంది..

తెలుగుకన్న మిన్నయైన..అమృతమసలు ఉన్నదేమి..!?