నీ నీడయె

నిలుపదగిన కవచంలా..దక్కెనోయి నీ నీడయె..! 
గ్రోలదగిన వెన్నెలగా..నిండెనోయి నీ నీడయె..! 

మావిగుబురులో దాగిన..కోకిలలా మనసైనది.. 
పాడదగిన పాటలోకి..ఒదిగెనోయి నీ నీడయె..! 

వింత ఏదొ జరుగుతోంది..ఊహకింత అందకుండ.. 
గీయదగిన బొమ్మవెనుక..దాగెనోయి నీ నీడయె..! 

ఈ మాటల జాతరలో..అక్షరాల చెలి ఎవరో.. 
వ్రాయదగిన గజల్ నిధిగ..మారెనోయి నీ నీడయె..! 

జాబిలితో జగడమాడు..జాణంటే ఇంకెవ్వరు.. 
చెక్కదగిన శిల్పం లా..చిక్కెనోయి నీ నీడయె..! 

రాజకీయ చైతన్యపు..వాహినిలో భాగమాయె.. 
విసరదగిన ఖడ్గంలా..దొరికెనోయి నీ నీడయె..!