నగరం నిద్రపోతున్న వేళ !
నగరం నిద్రపోతున్న వేళ !
జీవితం ఎప్పుడెలా ఉంటుందో !
కానీ , లోకంలో జనులందరు
తగిన భద్రతతో సాగితే
నిశ్చయంగా ఆనంద డోలికల్లో !
పగలు పనిపాటలకు సమయం .
రాత్రిళ్ళు హాయిగా విశ్రాంతి
తీసుకోవడం మనకు అవసరం .
అప్పుడే అందమైన జీవనం !
ఐనా , నగరం నిద్రపోతున్న వేళ
కొందరు వారి విధినిర్వహణలో ,
మరికొందరు లక్ష్యసాధనలో
మునిగి వ్యక్తిగత వ్యవహారాల్లో !
ప్రేయసిప్రియులు తమ ఇళ్ళలో
ఒకరి గురించి మరొకరు
అందమైన కలలు కనుచూ
అవి నిజం కావాలని కోరుతూ !
వినోదకార్యక్రమాల నిర్వాహకులు
సరాగాలతో , వెలుగురేఖలతో
నిషాలో తమాషాను చూసేవారు
గమ్యమెరుగని అడుగులతో !
అసామాజిక శక్తులు
చీకటి అలముకున్న వీధుల్లో ,
సంచరిస్తూ అజ్ఞాన తిమిరాల్లో
ఆర్జిస్తూ అక్రమ మార్గాల్లో !
ఒంటిస్థంభపు వీధిదీపాలు
ధ్యానముద్రలో కనిపిస్తూ ,
రద్దీగా ఉండే రహదారులు
కలతనిద్రలో దర్శనమిస్తూ !
రక్షణదళాలు మంచిని కోరుతూ
ఆశలకాంతులను వెదజల్లుతూ .
రోజురోజుకు నూతనోత్సాహాలతో
ప్రపంచం ఆవిష్కృతమౌతూ !!