నాన్నముద్దు

కన్నులెర్ర జేయవచ్చు..జ్ఞానమిడే నాన్నముద్దు..! 
లెక్కలేల కట్టవచ్చు..చూపునిడే నాన్నముద్దు..! 

చిన్నప్పుడు తనభుజాన..వాలిన ఓ జ్ఞాపకమది.. 
వీపుపైన తట్టుటలో..బలమునిడే నాన్నముద్దు..! 

బొమ్మలేల గీయవచ్చు..తనచేతుల చలువతీపి.. 
వేలుపట్టి నడచువేళ..వెలుగునిడే నాన్నముద్దు..!

చైతన్యపు శిఖరమనగ..కన్నులెదుట తానేనోయ్.. 
ఆశయాల సాధనలో..వేగమిడే నాన్నముద్దు..! 

బంధాలకు అతీతమౌ..మౌననిధిని తూచుటెట్లు.. 
అంచనాల కందనంత..భాగ్యమిడే నాన్నముద్దు..!