నాకలలకు రూపమిడే

అలసిపోని మైలురాళ్ళ..నవ్వెంతో బాగున్నది..! 

పరిమళించు నీ చూపుల..మెఱుపెంతో బాగున్నది..! 

ముంచెత్తే అక్షరాల..వెల్లువలో ఉంటి చెలీ.. 

ననుపాటగ మలచే నీ..ఒడుపెంతో బాగున్నది..! 

కబురులెన్ని చెబుతావో..కన్నులెదుట పడకుండా.. 

వింతమాయ మోసానికి..రూపెంతో బాగున్నది..! 

అడుగ నోరు మెదపలేని..పేదరికం అదేమిటో.. 

పేరుచెబితె వినాలనే..తలపెంతో బాగున్నది..! 

ఏ సితార రాగానికి..ఏవిరహం తీరేనోయ్.. 

తారామణి హారం నీ..మనసెంతో బాగున్నది..! 

నిదురెరుగని ఆశయాల..మల్లెతీగ మాట్లాడెను.. 

నాకలలకు రూపమిడే..పిలుపెంతో బాగున్నది..!